Source: Lokmat National
G20 Summit in India : G20 शिखर परिषदेची सुरुवात होताच राजधानी दिल्लीत जागतिक नेत्यांचा मेळावा पाहायला मिळाला. पंतप्रधान नरेंद्र मोदी जगातील अनेक प्रमुख नेत्यांशी भेट घेऊन अनेक करारांवर स्वाक्षरी करू शकतात असे बोलले जात आहे. त्यातच भारत, अमेरिका (US), सौदी अरेबिया आणि संयुक्त अरब अमिराती (UAE) यांच्यात जी-20 शिखर परिषदेत पायाभूत सुविधांशी संबंधित मोठे करार केले जाणार आहेत. हा करार रेल्वे आणि बंदरांशी संबंधित असेल. मध्य पूर्व आणि दक्षिण आशियाला जोडणारा बहुराष्ट्रीय रेल्वे आणि बंदर करार शनिवारी (सप्टेंबर 9) G20 शिखर परिषदेच्या बाजूला जाहीर केला जाईल. व्हाईट हाऊसच्या एका अधिकाऱ्याने ही माहिती दिली आहे.
हा करार अतिशय महत्त्वाचा
अमेरिकेचे राष्ट्राध्यक्ष जो बायडेन यांना जागतिक पायाभूत सुविधांवर चिनी पट्ट्याशी संघर्ष करायचा आहे आणि म्हणूनच हा करार अत्यंत महत्त्वाच्या वेळी केला जात आहे. वॉशिंग्टनला G20 गटातील विकसनशील देशांसाठी पर्यायी भागीदार आणि गुंतवणूकदार म्हणून सादर करण्याची बायडेन यांची योजना आहे.
या कराराचा उद्देश काय आहे?
अमेरिकेचे उपराष्ट्रीय सुरक्षा सल्लागार जॉन फिनर यांनी नवी दिल्ली येथे आयोजित शिखर परिषदेत पत्रकारांशी संवाद साधला. या दरम्यान ते म्हणाले की, या करारामुळे या भागातील कमी आणि मध्यम उत्पन्न असलेल्या देशांना मोठा फायदा होईल. यामुळे मध्यपूर्वेला जागतिक व्यापारात महत्त्वाची भूमिका मिळेल. मध्यपूर्वेतील देशांना रेल्वेने जोडणे आणि त्यांना बंदराद्वारे भारताशी जोडणे, शिपिंग वेळ, खर्च आणि इंधनाचा वापर कमी करून आखाती देशांपासून युरोपपर्यंत ऊर्जा आणि व्यापाराच्या प्रवाहाला मदत करणे हे उद्देश्य असल्याचे अमेरिकेच्या अधिकाऱ्यांनी सांगितले.
हे देश या करारावर स्वाक्षरी करतील!
या करारासाठी सामंजस्य करारावर युरोपियन युनियनचे देश, भारत, सौदी अरेबिया, संयुक्त अरब अमिराती, युनायटेड स्टेट्स आणि इतर G20 भागीदारांद्वारे स्वाक्षरी केली जाईल. राष्ट्रीय सुरक्षा सल्लागार जॉन फिनर म्हणाले की, या प्रमुख क्षेत्रांना जोडणे ही एक मोठी संधी आहे. या डीलची किंमत किती आहे याबाबत अद्याप कोणतीही माहिती उपलब्ध नाही.
